વાહનયોગ (ભૂપેન્દ્રસિંહ રાઓલ)


(ભૂપેન્દ્રસિંહ રાઓલ સૌરાષ્ટ્ર્ના માણસા એસ્ટેટના રજવાડી કુંટુંબમાંથી આવે છે. એમના લખાણોમાં એમનો રજવાડી મિજાજ ડોકિંયા કરતું હોય છે. આ લેખમાં તમને પણ એ મહેસૂસ થશે.-સંપાદક)

વાહનયોગ

૭૫૦ રૂપિયાની એટલાસ સાયકલ મારો પહેલો વાહન યોગ હતો. મારી કુંડળીમાં વાહનયોગ છે જ નહિ એવું જ્યોતિષીઓ કહેતા. પિતાશ્રી એમના મિત્રોમાં કોઈ જ્યોતિષ જાણતું હોય એમને કુંડળીઓ બતાવે રાખતા. હું નાનપણમાં બિનજરૂરી આવું માનતો પણ સમજ આવ્યા પછી હસવામાં કાઢી નાખતો.

પિતાશ્રી કદી સાયકલ શીખવા જવા દેતા નહિ. એમને ડર હતો કે સાયકલ શીખી આ છોકરાઓ અકસ્માત કરી હાથપગ તોડશે. એટલે હું નાનપણમાં સાયકલ પણ શીખેલો નહિ. એકવાર પ્રયત્ન કરેલો. ભાડાની સાયકલ છાનામાના લઈ આમારા બચપણના મિત્ર ભલારામ સાથે ઠીકરીયા મેદાનમાં સાયકલ શીખવા ગયેલો. ભલીયો પરપીડન વૃત્તિ ધરાવતો. કોઈને તકલીફ થાય તો એમાંથી આનંદ મેળવે. મને એક ઢાળ ઉપર લઇ જઈ સાયકલ પર બેસાડી કહે હવે રગડાવી માર સાયકલ આવડી જશે. મને સમજ ના પડી કે આનો ઈરાદો ખરાબ છે. મેં કદી સાયકલ ચલાવેલી જ નહિ તો પણ ઢાળ ઉપર સાયકલ પર બેસાડી એણે ધક્કો મારી દીધો. રમરમાટ થોડે દૂર જઈ બંદા પડ્યા અને ઢીંચણ છોલાઈ ગયા. પણ એમાંથી ભલીયાએ બહુ હસીને પુષ્કળ આનંદ મેળવ્યો. ત્યાર પછી મેં કદી સાયકલ શીખવાનો પ્રયત્ન કર્યો નહિ. મનમાં ડર ઘૂસી ગયેલો.

બહુ મોટી ઉંમરે સાયકલ શીખ્યો તે પણ પહેલેથી એના પર બેસીને ચલાવતો.. મને બીજા મિત્રોની જેમ એક પેડલ પર પગ મૂકી સાયકલ થોડી દોડાવી પછી એના પર છલાંગ મારી બેસતા કદી આવડ્યું નથી. વડોદરે ભણવા ગયો ત્યારે ભાડાની સાયકલો લઇ હું અને મિત્ર કલ્યાણસિંહ યાદવ આચાર્ય રજનીશના પ્રવચનો સ્વરૂપમ રજનીશ ધ્યાન કેન્દ્રમાં ચાલતા ત્યાં સાંભળવા જતાં. રજનીશ તો પુનામાં રહેતા પણ એમની નેવું મિનિટની કેસેટ આ લોકો મુકતા તે સાંભળવા મળતું.

માણસા રહેવા આવ્યો ત્યારે જ્યોતિષીઓની ના છતાં પહેલો વાહનયોગ ૭૫૦ રૂપિયાની સાયકલ ખરીદવાથી બન્યો. મોટાભાગના જ્યોતિષીઓ મારી કુંડળી જોઈ માથું ધુણાવતા. એમને એમાં કોઈ શક્કરવાર લાગતો નહિ. પહેલે ધનનો સૂર્ય-ચન્દ્ર, બીજે બુધ, ચોથે મંગળ, છઠ્ઠે કેતુ, દસમે ગુરુ, બારમે શુક્ર-રાહુ-શની, માંગલિક કુંડળી જોઈ જ્યોતિષીઓ ચકરાઈ જતાં. સાવ બોગસ કોઈ દરિદ્રની કુંડળી લાગતી. કોઈ સારા યોગ એમને દેખાતા નહિ. ભણવામાં લોચાલાપસી હશે, નોકરી ધંધો પણ એવો જ હશે. ધનયોગ દેખાતો નહિ. કોઈ રાજયોગ કે સારો યોગ જણાતો નહિ. વાહનયોગ પણ જણાતો નહિ, ટાંટિયાતોડ યોગ જ જણાતો. જોકે રોજ દસ કિલોમીટર દોડીને, હજાર વખત દોરડા કુદીને, ૧૦૦ બેઠકો કરી ટાંટિયાતોડ કરતો.

જ્યોતિષીઓની આગાહી ખોટી પડવાની શરુ થઈ હતી, હવે ઘરમાં સાયકલ આવી ગઈ હતી. હહાહાહાહા એવામાં અમે ધંધા માટે ટાટા કંપનીની મીની ટ્રક ટાટા-૪૦૭ લીધી. મને સાયકલ સિવાય કોઈ વાહન ચલાવતા આવડતું નહિ. ડ્રાઈવરોની દાદાગીરીને લીધે મારા ભાગીદારે કહ્યું કે હવે તમે ટ્રક ચલાવતા શીખી જાવ. એટલે હું કલોલમાં એક ડ્રાઈવિંગ ક્લાસમાં ગયો. ત્યાં તુમાખીવાળા કોચ સાહેબે જુના જમાનાની ફિયાટ પર શીખવવાનું ચાલુ કર્યું. પહેલા દિવસે પ્રથમગ્રાસે મક્ષિકા જેવું, કોઈ બાઈક જોડે ટકરાઈ ગયા. કોચ મારી પર ભડક્યો કહે તમને બાપ જીન્દગીમાં કાર ચલાવતા નહિ આવડે. ખરેખર પહેલા દિવસે એણે ધ્યાન રાખવાનું હોય ઉલટાનો મને દોષ દેવા માંડ્યો. પછી કલોલ શીખવા જવાનું પણ બંધ કરેલું.

પણ અમારી ૪૦૭ના ડ્રાઈવરોમાં એક મહારાજ ડ્રાઈવર સારો હતો. મને પરાણે એની બાજુમાં બેસાડી શીખવે. એકવાર અમે રાત્રે કેળા ભરવા ગાંધીનગર ગયેલા. મહારાજ તો કેળાં ભરાય ત્યાં સુધી ઘોરવા માટે કેબીન પર ચડી ગયો. હું નીચે બેસી રહેલો. કેળા ભરાઈ ગયા પણ મહારાજ જલ્દી જાગે તેમ નહોતો. કેળાંનાં વેપારી દેવીપુજકભાઈ કહે ચાલો હવે જઈએ. મેં તો ટ્રક ચાલું કરી દીધી અને હંકારવાનું ચાલું કરી દીધું. થોડી વારે મહારાજને ટ્રક હાલવાથી જાગવાનું થયું, તે એકદમ ગભરાઈને ચાલું ટ્રકે નીચે આવીને બેસી ગયો. શરૂમાં ગભરાઈ ગયેલો પણ પછી કહે ચાલવા દો હું બાજુમાં બેઠો છું. બસ પછી તો હું ય ડ્રાઈવર બની ગયો આખરે. મહારાજને બસ ચલાવવાની નોકરી મળી ગઈ. બંદા પોતે હવે ચલાવતા. એવામાં ગાંધીનગર ડેરીમાં ટેન્ડર પાસ થઈ ગયેલું. નાના ગામડાઓમાંથી નાની મંડળીઓ જે ખેડૂતો પાસેથી દૂધ ભેગું કરી મોટી ડેરીમાં પહોચાડે, ત્યાંથી દૂધનાં કેન જે ૪૦ લીટરના હોય તે ગાંધીનગર ડેરીમાં પહોચાડવાનું શરુ થયું.

ડ્રાઈવરો છુટા થતાં હવે ટ્રક હું જ ચલાવતો હતો. ચારેક મહિના થઈ ગયેલાં પણ મારી પાસે લાયસન્સ નહોતું. ભાગીદાર આમારા ભઈલા ઘનુભા કહે યાર લાયસન્સ લઇ લો, કશું થશે તો વીમો નહિ પાકે. ૪૦૭ લઈને જ ટેસ્ટ આપવા ગયેલો. ટેસ્ટ પત્યા પછી આર.ટી.ઓ. ઇન્સ્પેક્ટર કહે કેટલા મહિનાથી ચલાવો છો? સાચું કહેજો. મેં હસતા હસતા કહ્યું ત્રણેક મહિના થયા હશે. મને કહે તમારી બેધડક સ્ટાઈલથી ખબર પડી ગયેલી કે જુના ડ્રાઈવર લાગો છો, પણ આવું નો કરાય ગેરકાયદેસર કહેવાય.

ડેરીમાં એકવાર કશું કામ હશે એટલે સ્ટોર પર બેસતા ક્લાર્ક કહે મારું સ્કુટર લઇ જાઓ. મેં કહ્યું મને સ્કુટર નથી આવડતું. તો હસવા માંડ્યા. ટ્રક ચલાવો છો ને સ્કુટર નથી આવડતું? મેં કહ્યું ખરેખર નથી આવડતું. હું સાયકલ પરથી સીધું ચારચક્રી શીખેલો. કોઈ સાયકલ શીખે, પછી લુના જેવા મોપેડ શીખે, પછી સ્કુટર શીખે, પછી બાઈક શીખે, પછી કાર ચલાવે અને પછી ટ્રક ચલાવે. મારે ઊંધું ચાલતું હતું. સાયકલ પછી ટ્રક, પછી સન્ની જેવું મોપેડ પછી બાઈક ચલાવતો થયેલો. અને પછી ક્યારેક સ્કુટર ચલાવેલું. બાઈકની કોઈ પ્રેક્ટીશ હતી નહિ અને બજાજ કાવાસાકી ખરીદી પોલો ગ્રાઉન્ડમાં ચાર ચક્કર મારી સીધો ઘેર. બાઈક પર બરોડાથી છેક માણસા સુધી ચક્કર મારેલા.

ખેર પાછા આગાહી પર આવીએ. મારા શ્વસુર અમેરીકા સેટ થયા એટલે મને ખબર હતી કે વહેલી મોડી ફાઈલ મુકાશે. એક મિત્ર જેવા જ્યોતિષને મારો હાથ અને જન્માક્ષર બતાવી પૂછ્યું કે અમેરિકા જવાશે કે નહિ? મને કહે કોઈ કાળે નહિ જવાય, નસીબમાં કોઈ રેખા જ નથી. હાથમાં કહેવાને બદલે નસીબમાં કહી બેઠેલા. મેં કહ્યું રેખા આપણને બહુ ગમતી નથી, બચ્ચનને ગમતી હશે, આપણને મોટા ગાલવાળી માંજરી આંખોવાળી રાખી ગમે છે, પણ દાઢી વગરનો સરદારજી(ગુલઝાર સાહેબ) એને બથાવી ગયો છે. મેં કહ્યું યાર સસરા અમેરિકા છે ફાઈલ મુકવાના જ છે. તો કહે ગમે તે હોય લોચા પડશે નહિ જવાય, કોઈ વિદેશ યોગ જ નથી.

પત્નીની ત્રીજીવારની પ્રેગનન્સી વખતે માણસામાં ખેતી કરતો હતો. વાહનમાં ઘરમાં ખાલી સાયકલ જ હતી. માઢમાં બે મિત્રોના ઘેર મહેન્દ્ર-જિપ હતી. પણ જે મોડી રાત્રે વેણ ઉપડી તે સમયે એકેય જિપ હાજર નહિ. સ્કુટર ધરાવતા મિત્રો પણ ગેરહાજર. ગામમાં રીક્ષાઓ પણ બહુ ઓછી, તે પણ અર્ધીરાત્રે કોણ જાગે? શ્રીમતીને સાયકલ પર બેસાડી સાયકલ મારી મૂકી પરમાર સાહેબના દવાખાને. બે દીકરા તો હતા, ત્રીજી દીકરી આવે તો સારું એવી અદમ્ય આશા પર પાણી ફેરવતા ડૉ.નૌતમબા જાડેજા આવી ને કહે દીકરો છે.

ગાંધીનગરમાં ક્યારેક ટાટા-૪૦૭માં શ્રીમતીને બેસાડી શાકભાજી લેવા જતો, તો ક્યારેક પેલી એટલાસ સાયકલ પર બેસાડીને જતો. કાયમ શાક લેવા જઈએ એટલે પરિચિત થઈ ગયેલા શાકવાળા ભાઈઓ બહેનોને નવાઈ લાગતી.

જે જે યોગ નહોતા નસીબમાં તે અનાયાસે કહો કે મહેનતને લીધે કહો પ્રાપ્ત થયા. વિદેશયોગ પણ બન્યો. પહેલી કાર જૂની વપરાયેલી નિશાન હતી. પછી વાહનયોગની કોઈ નવાઈ રહી નહિ. પણ પેલી એટલાસ પાછળ કે કાવાસાકી બજાજ પાછળ વહાલસોઈને બેસાડી શાક લેવા જતાં, તે પાછળ ચીપકીને બેઠી હોય, કમરમાં ગલીપચી કરતી હોય, એની ભીની માદક મહેંક જિંદગીને તરબતર કરતી હોય એની જે મજા હતી તે આજની મોંઘી કારમાં પણ આવે નહિ. :- ભૂપેન્દ્રસિંહ રાઓલ, સ્ક્રેન્ટન.

 

હાલમાં બાપુના સ્ટેબલમાં તેજીલા તોખારો સાથે માણકી પણ જોડાણી

6 thoughts on “વાહનયોગ (ભૂપેન્દ્રસિંહ રાઓલ)

  1. સુંદર લેખ.
    યાદ આવ્યું કે અઠવાડિયા પહેલા એક જ્યોતિષીએ કહેલું કે તમારે નજીકના સમયમાં વાહનયોગ છે. વાહન તો હતું જ પણ તેના પર વહન કરવાનો યોગ અત્યારે આવ્યો લાગે છે. અને આણધાર્યો અંત ‘વાહનયોગની કોઈ નવાઈ રહી નહિ. પણ પેલી એટલાસ પાછળ કે કાવાસાકી બજાજ પાછળ વહાલસોઈને બેસાડી શાક લેવા જતાં, તે પાછળ ચીપકીને બેઠી હોય, કમરમાં ગલીપચી કરતી હોય, એની ભીની માદક મહેંક જિંદગીને તરબતર કરતી હોય એની જે મજા હતી તે આજની મોંઘી કારમાં પણ આવે નહિ. ‘
    વાહ

    Like

  2. લેખ વાંચી મારી સાઈકલ શીખવાની ધગશ, અને તેના પરિણામોની યાદ આવી ગઈ.
    સરયૂ મહેતા-પરીખ

    Like

  3. ભુપેન્દ્રસિંહ બાપુના વાહનયોગની વાત વાંચીને ઘણાથંને પોતાની વીતકકથા કહેવાનું
    મન થાય એ સ્વાાવિક છે. મારે બીજી જ વાત કહેવી છે. બાપુએ વાત વાતમાં પોતાની
    કુંડળી વિષે જે વર્ણન કર્યું તે ખોટું હોવાની કોઈ શંકા નથી, તેમ છતાં
    મોટાભાગના જ્યોતિષીઓ ખોટા પડ્યા તે વાત જાણીને મને દુ:ખ થયું. દુ:ખ એટલા માટે
    કે ન જાણતા હોઈએ તો ના કહી દેવું જોઈએ કે મને એટલું જ્ઞાન નથી, પણ ખોટી રીતે
    મૂંછ ઊંચી રાખવા જે ગપગોળા ચલાવ્યા તે કોઈ રીતે શોભાસ્પદ નથી. આવા જોશીઓ
    સમાજનું અહિત કરતા આવ્યા છે.

    પહેલાં હું વાહનયોગની વાત કરું તો કુંડળીના ચોથા સ્થાન – સુખ સ્થાન પરથી
    વાહનસુખ જોવાય છે. ચોથા સ્થાનમાં ગુરુની મીન રાશિ છે અને ગુરુ દસમા સ્થાને
    બિરાજીને પોતાના સ્થાન પર સાતમી દૃષ્ટિથી જુએ છે. એને વાહન સુખ કેમ ન મળે? હું
    તો કહું કે મળે જ મળે.

    ગુરુ જો ચોથા સ્થાને બેઠો હોય કે દૃષ્ટિ કરતો હોય તો અભ્યાસમાં પણ તેજસ્વી
    બનાવે. એટલિસ્ટ હાઈસ્કૂલ સુધી તો ખરું જ.

    વિદેશ યોગ માટે બારમું સ્થાન જોવાય છે. બારમે રાહુ હોય તો પરદેશ જવાની શક્યતા
    ઊભી કરે છે. બારમે રહેલા અશુભ ગ્રહો માણસને જરૂર વિદેશ લઈ જાય. બાપુના બારમા
    સ્થાનમાં શનિ અને રાહુ બે અશુભ ગ્રહો છે. અને છઠ્ઠે રહેલો કેતુ પણ બારમે
    દૃષ્ટિ કરે છે. એટલે વિદેશયોગ માટે ના પાડવાનું કોઈ કારણ નથી.

    બારમે રહેલો શુક્ર કોઈપણ રાશિમાં રહેલો હોય તો પણ તે શોખીન બનાવે છે. એમની
    પસંદગી ઉત્તમ ચીજ વસ્તુ પર જ હોય. સારું ખાવાનું, સારું પહેરવાનું, સારી અને
    અપટુડેટ વસ્તુઓ વાપરવાનો શોખ હોય. સુગંધી દ્રવ્યો, પરફ્યુમનો ચાહક હોય.
    આકર્ષકતા પસંદ હોય.

    ચોથે મંગળ માણસને થોડો અપસેટ રાખે, નિરાંતે ઉંઘવા ન દે. સતત કંઈ ને કંઈ
    પ્લાનિંગ ચાલતું રહે. આ મંગળ ઉત્તરાવસ્થામાં સંતાપની આગાહી કરે છે. જો કે ચોથા
    સ્થાન પર ગુરુ મહારાજના આશીર્વાદ પણ ઉતરેલા છે એટલે રાહત રહે. પણ હમણાં શનિ
    મહારાજનું ધન રાશિ પરનું ભ્રમણ પનોતીનો પરચો કરાવે એ શક્ય છે.

    બાપુનો જન્મ અમાસને દિવસે કે થોડા કલાક આગળ પાછળ થયો હશે અને તે ડિસેમ્બરની
    પંદરમીથી જાન્યુઆરીની ચૌદમીની વચ્ચે થયો હશે. ધન રાશિનો ચંદ્ર માણસને જિદ્દી
    બનાવે છે. પોતાની જ વાત ખરી છે એમ મનાવવાનો સ્વભાવ હોય છે. ચંદ્ર ઉપરાંત સૂર્ય
    પણ ધનનો છે એટલે મન અને આત્મા બંને ધન રાશિની અસરમાં આવે છે ત્રીજું મહત્વનું
    બળ તે લગ્નમાં રહેલો સૂર્ય છે. જાતક કોઈપણ જ્ઞાતિમાં જન્મેલો હોય તો યે કોઈની
    તાબેદારીમાં કામ કરવાનું જરાયે પસંદ નહિ કરે, જ્યારે અહીં તો જાતકનો જન્મ જ
    દરબાર કોમમાં થયો છે. તેઓ તેમનું ધારેલું જ કરે. બાપુ રાજા માણસ છે ાેમાં ને
    તો કોઈ શંકા નથી. માથાના વાળ આછા હશે અથવા ટાલ પડવાની શક્યતા પણ ખરી.

    પગની પાટલીવાળા ભાગમાં વાગવા દાઝવાથી સંભાળવું પડે. આંતરડા પેઢુના ભાગમાં કોઈ
    દર્દ થવાની સંભાવના ખરી. એમ તો મંગળ પર ગુરુની દૃ્ષ્ટિ પડતી હોય તો ગુરુ
    માંગલ્ય યોગ થાય એ માણસને ઉદારવાદી બનાવે, પણ ડાયાબિટિસનો પણ સંકેત કરે.
    ગ્રહોની સ્થિતિ કેટલા અંશની છે તે ખબર ન હોવાથી ઉપલક માહિતીના આધારે આટલું
    લખ્યું છે.

    મારી વિનંતી છે કે આ વાતને હળવાશથી લેવી. આ બધી વાત ખોટિ પણ હોઈ શકે. કારણ કે
    સંપૂર્ણ કુંડળી હાથમાં નથી. અને બીજી અગત્યની વાત એ છે કે ગ્રહો તો શક્યતા
    બતાવે કે સંકેત કરે એ આવું થઈ શકે અથવા આ કામ થવામાં સંદેહ રહે છે. કોઈને સોય
    ઝાટકીને એમ ન કહી શકાય કે આમ જ થાય અને આમ તો ન જ થાય! એવો અધિકાર માત્ર ઓછા
    જ્ઞાનવાળા લોકો માટે અનામત છે! કઠોર પરિશ્રમથી કોઈ પણ દુ:સાધ્ય કામ સાધ્ય થઈ
    શકે છે; મહેનત પડે એટલું જ.

    Like

પ્રતિભાવ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s