ધોધમાર ઝંખનાનું ગીત ( હેમંત ગોહિલ “મર્મર” )

હાલ્યને અટાણે સૈ, હાલીએ હટાણે મારે આખ્ખું ચોમાસું આજ વ્હોરવું….

મુઠ્ઠીભર માવઠામાં તળિયુંય ઢંકાય નહીં, કેમ કરી હાંડલીમાં ઓરવું ?

માંગ્યું મંગાય કૈંક માંગવાની રીતમાં

ચોમાસું કોઈનું મંગાય કૈં ?

વીંઝાતા વાયરામાં તૈડાતી જાય સીમ

ભીતરમાં કૈંક લંઘાય, સૈ.

અરધા આંધણ મૂઆં માગે ઓબાળ હજી,  છાણાને કેટલું સંકોરવું ?

ફળિયામાં આમતેમ ટોળે વળીને કોક

મેંદી મૂક્યાની કરે વાતું;

વાતું તો હોય સખી, ઝરમરીયું ઝાપટું,

ભીનું તરબોળ ક્યાં થવાતું ?

ચોમાસું હોય તોય મૂંગો મંતર એવા ખોટુંડા મોરમાં શું દોરવું ?

થઇ જાતી રાળ રાળ આખ્ખીયે સીમ એવો

ધીંગો વરસાદ મને ગોઠે;

માટીની મહેક બની ફોરે ગરમાવો ત્યારે

તરસ્યું છીપાય મારી હોઠે.

ક્યાં લગ તરાગડે મોતીડાં ઠેલતીક વણવરસ્યા દિવસોને પોરવું ?