દરિયો મોકલ હવે વ્હાલનો (દીપલ ઉપાધ્યાય ‘ફોરમ’)

(ગીત)

કે દરિયો મોકલ હવે વ્હાલનો

સાવ કોરો લાગે છે મને પડતો વરસાદ ઓણ સાલનો…

કે દરિયો મોકલ હવે વ્હાલનો

ચીતરીને લાભ-શુભ રાખ્યા છે હોંશથી

અધખુલ્લું રાખ્યું છે બારણું;

બારસાખે રાત-દી ઝૂલ્યા કરે છે હજી

તોરણની જેમ સંભારણું.

એવી અવઢવ કે સમજાવવું કેમ તને વંટોળ પણ હોય ગુલાલનો…

કે દરિયો મોકલ હવે વ્હાલનો

છાલક પ્હેરીને દ્વારે આવેલો વાયરો

મારામાંથી મને ખોળતો;

ભીના તરબોળ ગીત મૂકીને ઉંબરે

આખ્ખી મને એમાં બોળતો.

મારું હોવું સાવ મીરાં થઇ જાય એમ આવે છે સાદ કરતાલનો..

કે દરિયો મોકલ હવે વ્હાલનો