હૃદયના શુદ્ધ પ્રેમીને – પ્રભુલાલ દ્વિવેદી

(જૂની રંગભૂમી એટલે રસકવિ રધુનાથ બ્રહ્મભટ્ટના સદાબહાર ગીતો અને પ્રભુલાલ દ્વિવેદીના સંવાદો અને ગીતો. દેશી નાટક સમાજના નાટક “માલવપતિ મુંજ” માટે પ્રભુલાલ દ્વિવેદીએ લખેલું આ ગીત જ્યારે માસ્ટર અશરફખાનના બુલંદ અવાજે ગવાતું ત્યારે “વન્સ મોર” ની તાળીઓ અને સીટીઓથી ભાંગવાડીનું પ્રિંસેસ થીએટર ગુંજી ઊઠતું. માત્ર છ પંક્તિઓના આ ગીતમાં રહેલો સંદેશ ખૂબ જ તત્વજ્ઞાનસભર છે. છેક ૧૯૭૬ માં એ જ નામે બનાવેલી ફીલ્મમાં પણ આ ગીત સાંકળી લેવામાં આવ્યું હતું. અનેક સ્વરોમાં આ ગીત યુ ટ્યુબમાં ઉપલબ્ધ છે.)

હૃદયના શુદ્ધ પ્રેમીને નિગમના જ્ઞાન ઓછાં છે,

ન પરવા માનની તોયે બધા સન્માન ઓછાં છે.

તરી જવું બહું સહેલું છે, મુશ્કિલ ડૂબવું જેમાં,

અરે એ રસ સરિતાથી ગંગાસ્નાન ઓછાં છે.

પ્રણય કલહે વહે આંસુ ચૂમી ચાંપી હૃદય સ્વામીન,

અરે એ એક પળ માટે જીવનના દાન ઓછાં છે.