આંગણાંના ત્રણ વર્ષ (પી. કે. દાવડા – સંપાદક)

આજે ૧ લી ડીસેંબર, ૨૦૧૯ ના આંગણું શરૂ કર્યાને ત્રણ વર્ષ પુરા થયા. આ ત્રણ વર્ષ દરમ્યાન મેં મારી આવડત અને ક્ષમતા અનુસાર આંગણું ચલાવ્યું. બીજા સેંકડો ગુજરાતી બ્લોગ્સને ચીલે ન ચાલતા મેં આંગણાં માટે અલગથી ચીલો ચાતર્યો. શરૂઆત લલિતકળાથી કરી. થોડા સમયમાં જ એમાં સાહિત્ય વિભાગ ઉમેર્યો. આ બન્ને વિભાગમાં પ્રતિભાશાળી સર્જકોને ત્રણ ત્રણ મહિના માટે પોતાના સર્જનોના પ્રદર્શન માટે Platform ઉપલબ્ધ કરાવ્યું. મને કહેતાં આનંદ થાય છે કે આંતરરાષ્ટ્રીય ખ્યાતિ પામેલા કલાકારો અને અમેરિકા અને ભારતમાં વસતા લબ્ધપ્રતિષ્ઠિત સાહિત્યકારોએ આ બન્ને વિભાગોમાં યોગદાન આપ્યું.

થોડા સમય બાદ આંગણાંમાં સમાજસેવા વિભાગનો ઉમેરો કર્યો. ડો. ભરત ભગતે સતત છ મહિના સુધી આ વિભાગ માટે સામગ્રી પૂરી પાડી. ૧ લી જાન્યુઆરી ૨૦૨૦ થી આંગણાંમાં વિજ્ઞાન વિભાગ ઉમેરવાની ઇચ્છા હતી. આના માટે મેં આંતરરાષ્ટ્રિય ખ્યાતિ પામેલા બે ગુજરાતી વૈજ્ઞાનિકોનો સંપર્ક પણ સાધેલો, અને એમાં મને હકારાત્મક જવાબ પણ મળેલા.

થોડા સમયથી આંગણું હાલની Format અનુસાર ચલાવવું મારા માટે મુશ્કેલ થતું જાય છે. ઉમ્મર ઉમ્મરનું કામ કરે છે.

ડીસેંબર ૨૦૧૯ સુધીના મારા બધા વચન મેં યેનકેન પ્રકારેણ પૂરા કર્યા છે. જાન્યુઆરી ૨૦૨૦ થી મેં કોઈને કોઈપણ જાતનું વચન આપ્યું નથી. જાન્યુઆરીથી હું પણ આંગણું અન્ય બ્લોગ્સની ચીલાચાલુ પધ્ધતિ પ્રમાણે ચલાવવાની કોશિશ કરીશ. વિજ્ઞાન વિભાગ શરૂ ન થઈ શક્યું એનો અફસોસ રહેશે.

હવે યોજના એવી છે કે આંગણાંમાં પોતાના સર્જન મૂકવા માગતા પ્રત્યેક સર્જકના નામનું એક એક ફોલ્ડર બનાવીશ. સર્જકો જેમ જેમ સામગ્રી મોકલે તેમ તેમ એમના ફોલ્ડરમાં સાચવતો જઈશ, અને મારી સગવડ અનુસાર એ પ્રસિધ્ધ કરતો રહીશ. અગાઉથી નિર્ધારિત કોઈ કાર્યક્રમ નહીં. કોઈ પક્ષપાત નહીં.

ગયા ત્રણ વર્ષ દરમ્યાન સાથ-સહકાર આપનાર બધા સર્જકો અને વાચકોનો હ્રદય્પૂર્વક આભાર માનું છું

-પી. કે. દાવડા